"#ጥቃቅን ቡድን?" የምክክር ኮሚሽኑ ሥያሜ። #ሰብዕናን #ይጫናል። ሰብዕናዊ ክብርንም ይዳፈራልም።

 

"#ጥቃቅን ቡድን?" የምክክር ኮሚሽኑ ሥያሜ። #ሰብዕናን #ይጫናል። ሰብዕናዊ ክብርንም ይዳፈራልም።

 

"የዋሆች ብጹዓን ናቸው፤

ምድርን ይወርሳሉና።"

(የማቲወስ ወንጌል ምዕራፍ ፭ ቁጥር ፭)

 

#ምዕራፍ ፲፱።

 

የምክክር ኮሚሽኑ ለሥራ እንዲያመቸው የጉባኤውን ተሳታፊ በተለያዩ ዘርፎች ማደራጀቱን አዳምጫለሁኝ። "#ጥቃቅን ቡድን" የሚለው አልተመቸኝም። ንዑስ እንዳይሉት #ንዑስ የሚባል አለ። ከንዑስ ዝቅ ያለውን ይመስለኛል "#ጥቃቅን ያሉት። 

 

ቡድኑ የሰወች #ማህበር ነው። ቡድን ለቋሚም ለጊዚያዊም ተግባር ይደራጃል። የምክክር ኮሚሽኑ የጉባዔ አደረጃጀት #ለጊዜያዊ ተልዕኮ ነው።

 

ቡድኑ ለተወሰነ ጊዜ፤ በተሰጠው አጀንዳ፤ በተፈቀደለት #የጊዜ ማዕቀፍ ተለይቶ የተሰጠውን #ተግባሩን ከውኖ የሚያስረክብ። ለሰወች ጊዚያዊ ይሁን ዘላቂ ቡድን "#ጥቃቅን" ማለት ይከብዳል። #ሰብዕናን #ይጫናል።

 

ጥቃቅን #ለቁስ ሊሆን ይችላል። #የነገር ሥም። ለሰው ልጅ ማህበር ግን "#ጥቃቅን" ፈጽሞ የማይመጥን ሥያሜ ነው። ከጥቂት ደቂቃወች በፊት መግለጫ ተሰጥቷል። ከዛ ስሰማው ከበደኝ።

 

ከጥቃቅን ይልቅ #መሠረት ቢባል የተሻለ በሆነ ነበር። #መነሻ ቢባልም እንዲሁ ለሰው ልጅ የሰብዕና ልዕልና የሚመጥን ይመስለኛል። አስኳል ይባላል በፖለቲካ አደረጃጀት። ይህንንም ከአዕውፋት ዝርያ ወይንም ከዶሮ፤ ከቆቅ፤ ከዥግራ ጋር የሚያገናኝ መንፈስ ስላለው፤ እንደ "#ጥቃቅን" ባይከብድም ………

 

ቡድን #በሰው ልጅ ነው የሚደራጀው። ስለዚህ ለሰው ልጅ ማህበር የሚሰጠው ሥም #መጣኝ፤ #በክብሩ ልክም ቢሆን ጥሩ ነበር። ፈጣሪ አልቆ፤ አጽድቆም በእኔ ዕሳቤ አጹሞም የፈጠረው የሰው ልጅን "ጥቃቅን" ሰብዕናን ይገስፃል።

ለምክክሩ ኮሚሽን ለታሪክ አዘጋገብ፤ ለአሻራም፤ ለትውፊትም፤ የሰውን ልጅ ማህበር "ጥቃቅን" ለእኔ አልተመቸኝም። በዘመነ - ህወሃት "በጥቃቅን" የተደራጁ የሚለው ነገር ነበረው። የዛ ውርስ መሰለኝ። የምክክር ኮሚሽኑ ቃሉን እንዳለ መውሰዱ የተገባ ነው ብዬ አላምንም። #የንዑስ - #ንዑስ ቡድን ማለት ይቻል ነበር።

እርግጥ ነው የዘርፋ አባላት ተግባራቸውን በማጠናቀቅ ላይ ስለመሆናቸው አድምጫለሁኝ። ተልዕኮው ከመሠረቱ ወደ ላይኛው ክፍል ቢሄድም የቡድኑ #ሥያሜው ግን ቀጣይ ይሆናል።

በአንድ የታሪክ ማዕቀፍ ውስጥ ያለ ማናቸውም ክስተት ተግባሩም፤ ሂደቱም ዝክረ ይሆናል። #በቋሚነት ልል አልችልም። የኢትዮጵያ ፖለቲካ የቀደመን ነገር በአወንታዊ ተቀብሎ የማስቀጠል ባህል የለሽ ስለሆነ። ቢሆን ግን አፍሶ ከመልቀም፤ ለቅሞ ከማፍሰስ አዟሪት ውስጥ ቢወጣ የመዋለ - መንፈስ፤ የመዋለ - ንዋይ፤ የመዋለ - ጊዜ፤ የመዋለ - ተግባር #ጥሪት ቅርስም መሆን ይችል ነበር።

ማህበረ ቅንነት እንደምን አድራችሁ፤ አረፈዳችሁ፤ ዋላችሁልኝም።

ቸር አስበን ቸር እንሁን። አሜን።

ቅን አስበን፤ ቀና እንሁን። አሜን።

ኑሩልኝ። አሜን።

እግዚአብሄር ይስጥልኝ። አሜን።

ሥርጉተ©ሥላሴ።

Sergute©Selassie.

28 / 07/026.

ጊዜ ራዲዮሎጂ ነው አሜን።

See less